Twee Lüüd ut Edendörp. Keen Edendörper “Urgestein”, as man so seggt, man blots „Togereiste“ - ober dat ok all siet mennig Johrn. Born sünd se ober in düsse Gegend, een in Glückstadt, de anner in Schen´feld.
Sünd al as Kinner mit dat Plattdüütsche opwussen, ober denn weer dat jo so: in´ne School un denn in´t Arbeidsleben wör jümmers hoochdüütsch snackt. Blots wenn se mol mit´n Plattdüütschen to doon harrn, denn keem dat wedder dörch, un vergeten hebbt se dat nie nich, de Leev to uns plattdüütsche Sprook.
Frünn sünd de beiden al ´n lange Tied. Un as in´n „Heimatverband für den Kreis Steinburg“ een „Arbeidsgemeenschop Nedderdüütsch“ gründt wor, drepen se sik op dat Gründungsversammeln, ohn dat se sik doröber afsnackt harrn. Nu hört se beide to den „Krink Een“ in de AG Nedderdüütsch, Addi as „Chef“, mit noch´n poor Maaten, un verseuk, de Minschen dorto to bringen, dat uns Platt mol wedder öfter snackt ward.
Den „Krink Een“ kanns ok anhüern, sünd so bi un um 6 -8 Lüüd, un de lest denn Geschichten un Gedichte un singt mit de Tohörers tosomen plattdüütsche Leeder. Kost´nix. Dor hebb´se Spoß an.